يا حركاتك يا امتحانات

من طرف nona 2008-04-23, 12:22 am

أخوتى فى الله

قربت الامتحانات فهى على الابواب
ويوم الامتحان يكرم المرء او يهان

ودق الجرس واشتد المغص
ومن سهر الليالى بات للعام التالى
واللهم اجعل كلامنا خفيف على الدكاتره بلسم على المراقبين قشطه على المصححين

وبما انى كنت زيكم فى يوم من الايام وعارفه اخواتى انكم مزززززنووووقيين جدا
فمن خلال خبرتى دائما ما تحدث ايام الامتحانات حاجات غريبه ليس لها تفسير
قد يستغرب لها الكثيرين
لكنى ومن موقعى هذا (المنزل ) اقولكم اخوتى دى حاجات عاديه جدا جدا وعلشان كده قولت اقولكم على هذه الاعراض الطبيعيه جدا

1- تبقى قاعد مصدع ومش قادر تعبان ومش عارف ليه وايه اللى حصلك وتقول اكيد حد نقرنى عين
وتقعد الست الوالده تقول عينى عليك يابنى قروا عليك حسدوك ياضنايا منهم لله اللهى تندب فى عنيهم رصاصه كل اللى شافك ومصلى على النبى

2- تنزل عيلك الفجعنه و الجوع كأنك كنت فى بلاد نم نم او الصومال اوكانك عايش فى مجاعه تقعد ال3 وجبات اول واحد وتقوم اخر واحد من على الاكل مسكين يا حرام جعان مهى المذاكره بتجوع (شوف ازاى ) وميمنعش قد 5او 6 تصبيرات فى النصف ويا سلام لو الماده تقيله وضع مختلف

3- تنزل عليك فجأه صله الرحم والود لصحابك القدام وقرايبك اللى ممكن متكنش بتعبرهم أصلا فى العادى قال علشان يدعولك وتقعد ترغى ساعات فى التليفون

4- ينزل عليك وسواس الست نظيفه وسواس النظافه (نظام القطنه مبتكدبش ) وتدخل تاخد دش وتغيب 10ساعات فى الحمام وتقعد تسبسب فى شعرك 3 ساعات وجل وبتاع وبرفان وهيصه كأنك حتتجوز بكره كله لزوم التركيز وفتح النفس (أه ماهى النظافه من الايمان ايه يعنى تعقد منكوش ميصحش )

5- فجأه ينزل عليك طاعة الوالدين وتقضى كل المشاوير بتاعة البيت كلها وتساعد مامتك فى كل حاجه ولو بنت يا سلام تعمل العشا وتغسل المواعين وكله علشان تريح مامتها رضا الوالدين ياجماعه (وهى او هو فى الطبيعى يقدر حد كده يقوله على حاجه منخلصش من اللى حيتقال )

6- ويا سلام بقى نفسك تتفتح للاكل وكل شويه ماما نفسى فى الاكله الفلانيه ولا العلانيه (نظام ريحة مانجه ولا نفسى رايحه للبطيخ ولا شامم ريحة مشمش ) ويعينى مامتك ياعينى يابنى اقولى نفسك فى ايه بس وان اجبهولك (كل ده علشان نفس جنابك تتفتح للمذاكره )

7- وفجاه كده تقوم قايم من على الكتاب وانت لسه قاعد قال ايه حتشوف حتروح بأيه بكره الامتحان وتقعد تقيس ساعه فى هدومك اللى هما (عد غنماتك يا جحا ) وقال ايه اصلك كمان خايف لا النور يقطع ومتلحقش تكوى (يعنى تروح بالهدوم مكسره من غير مكوى ميصحش ومتجيش ) وياسلام لو الواحده عندها فرح بعد الامتحانات بشهر تقعد تفكر حتلبس ايه فيه ,

8- فجأه تفتكر ان فيه نمره عاكستك من قد3شهور كده تقعد وراه وتروح متصل بيه مبهدله ويا سلام بقى لو طلعت واحده (حتى فى الامتحانات مش عاتقين

9- فجأه ينزل ازعاج الجيران وعيالهم عاملين وش ودوشه خبط ورزع ومش عارف تركز (شوف ازاى )وفجأه يجيلك أبو النوام ويهف عليك النوم ويجى يصحوك متقومش ولا حتى بالطبل البلدى

10- وكل شويه طالع من الاوضه ايه رايح الحمام ، رايح اصلى ، رايح اغسل وشى ، رايح اعمل شاى اصلى مصدع ، رايح أشرب ، رايح تفتح التلاجه تبص فيها وتقفلها تانى ، ايه وهو مفيش حاجه حلوه ؟ ، هى الساعه كام ، هو الشاحن بتاعى فيين وهكذا ...........الخ

دى اخوتى كانت نبذه مختصره من اللى بيحصل فى ايام الامتحانات بالذات
كلها حركات مفقوسه من النوعيه دى