توتو على كابوتو

بقشـــــــــــــــــــيش



كلمة كئيبة معناها انك حترمي فلوسك على الارض مقابل اللاشئ



منين جت الكلمة السودة دي



الحمد لله المرة دي مش حنقدر نمسحها في الفراعنة و نقول ان الفراعنة هما اللي اخترعوها
لان الامريكان هما اللي اخترعوها المرة دي
طبعا اخترعوا كلمة Tips مش كلمة بقشيش



مهي كل مصيبة اليومين دول تلاقي الامريكان في ضهرها



بس الامريكان لما اخترعوها مكنش قصدهم حاجة وحشة



كان قصدهم تدفع زيادة مقابل انك تاخد خدمة اسرع



يعني كان الدفع مقابل خدمة


يعني حضرتك حتدفع فلوس بدل سرعة



او بمعنى ادق بدل ما تتلطع



و قال ايه بيقولوا ان البقشيش بيأثر في اقتصاد امريكا على حسب ما قريت انه بيقدر بحوالي 26مليار زرار قصدي دورلار $ سنوياً


على فكرة يا كتاكيت البقشيش إجباري في امريكا لدرجة انك ممكن تدخل مطعم تلاقيه حاطط يافطة غبية كدة مكتوب فيها البقشيش ليس مدينة في الصين
يعني بالبلدي كدة ما تستعبطش يا حلو و قب بالبقشيش

انا عن نفسي لو شوفت اليافطة دي حطنش خالص و اعمل عبيطة

اما كلمة بقشيش العربية بعينها و سخصياً فجت من الكلمة التركية بخشيش بمعنى هبة او منحة
يعني نوع من المساعدة اعانة يعني شحاتةيعني

الغريب بقا ان التيبس دة او البقشيش بالعربي ايام الاختراع دة ما كان لسة جديد و طازة كان المفروض يدفع قبل ما تاخد الخدمة مقدماً يعني
يعني ادفع تاخد بسرعة
متدفعش
استنى دورك و يحينا و يحيك ربنا

في مصر بقا سمناها تشهيلات و اكراميات و بقشيش طبعا و كلها حاجات و مسميات مقابل الهوا

تدخل محل تلاقي البياعة واقفة بين ضوافر رجليك و كل لما تتحرك تتكعبل فيها
من غير ما حد يندهلها و لا يعبرها اساسا
تفضل تتمحك فيه
و انت اساسا متدبس في البتاع اللي خدته و دافع تمنه الدوبل
و الف مبروك يا ياشا و مستنية انك تطلع مبلغ يعادل نص تمن البتاع على الاقل بقشيش
ليه يا حاجة هو انتي كنتي مخيطاه على اديكي و الا مدايني حاجة من دولاب السيد الوالد
منتي شغلتك انك تجيبي البتاع و تغيريه و تبدلية لحد ما اتجنن في عقلي و اخد البتاع

يعني حضرتك شغلتك بياعة مش فتوة و فارضة عليا اتاوة دة انا اللي المفروض اخد منك بقشيش لاني استحملت رخامتك و كعبلتك فيا

الناس وجهة نظرها مختلفة في البقشيش و البقششة
يعني انا كواحدة من الناس ( غيرك يا واحدة من الناس طبعاً ) بعتبره تنبلة و يبقى نفسي و منى عيني مدفعش لكن بدفع غصب عني و انا مغمض العين مسدود الانف

ناس تانية فاكرين البقشيش شياكة و منظرة و انعرة
كل واحد يتمنظر ادام الناس اللي معاه انه دفع 2جنية و ربع بقشيش و خصوصا لو معاة نصه العدل

و فيه ناس بقا عاقلة جدا بتشوف ان البقشيش دة سبب لتبويظ شخص و انتخته زي الصينيين و اليابنين اللي مبيسمحوش بالقشيش دة خالص و بيعتبروه اهانة و شتومة

لو خدتلك جولة حرة كدة في مصر
حتكتشف ان عشر البلد بياخد بقشيش

سايس واقف في الشارع عايز منك فلوس رغم انه مش شارع ابوه و لا الابعادية اللي سابهالو جدو الباشا
لدرجة انك بتلاقي نفسك بتدفع لاي واحد واقف جمب العربية و منتش عارف هو سايس و الا تاية بالرغم يعني ان السايس دة بيعتبر كل اللي عندهم عربية مبيعرفوش يسوقوا و لولا توجيهاته النادرة كنت لبست في حيطة او طلعت خدتلك لفة على الرصيف على اعتبار انه شوماخر و هو الوحيد اللي بيفهم في السواقة


بواب العمارة بتاعتك اللي بيبصلك بقرف لو مبتدلوش – ابقوا شوفوا حتة من فيلم البية البواب لما يقعد البوابحاطط رجل على رجل و انت داخل معاك شيلة و هو و لا يعبرك

الولد اللي شايل كشاف و بيقعدك في السينما
ياعم سيبني انا عارفة السكة
و دة راسة و الف سيف لازم يوصلك

حتى سواق التاكسي اللي حيسلخك و انت نازل عايز بقشيش – بقشيش ايه يا عم هو انا راكب في عربيتك الليموزين

او واحد تاني واقف على باب الحمام في أي مول يخليك لما تشوف خلقته و تناحته تدخل الحمام تاني

و يا داهيتك السودا لو دخلت مستشفى
تطلع حكومي تطلع استثماري تطلع زي ما تطلع ان شالله في الحلم حتى
لازم تدفع
يا الدفع يانقتلك قريبك
لو الشخص دة داخل يعمل عمليه خطيرة و انت مركز في دعاك تلاقي حاجة لابسة ابيض × ابيض اقتحمت خلوتك و عايزة بقشيش حلاوة العملية
يا ستي هو كان لسة عمل العملية و الا قام بالسلامة
تتنح و تقولك عشان تدعيلك
و انت تبتدي تقلق و تسأل نفسك يا ترى لو مدفعتش دة ممكن يأثر في العملية و تديها على احتمال انها حتشتري بالفلوس دي قطن و حقن
و بعد ما تدفع تفتكر انت كنت بتعمل ايه فتلاقي نفسك نسيت و تعتمد على دعاء الست ام ابيض × ابيض

المصيبة ان في ناس مساكين عايشين على البقشيش زي عمال محطات البنزين اللي اساسا شغالين بالسخرة
و الربع جنية اللي انت بتسيبو بيحطوة على غيرة و يقسموه على بعض



طب احنا في مصر كل فاتورة دافعين عليها على الاقل 12% خدمة غير الضريبة و كمان انواع غريبة زي ضريبة الملاهي دي يعني لو فاتورتك على اقل تقدير بـ 50جنية يعني حضرتك شاري شوية فول و طعمية و مخلل يبقى الـ12% دول 6 جنية بحالهم
ندفع تاني بقشيش لية اومال الـ12% دول بتوع ايه

هو كان المفروض انا ادخل المطعم اصبن الاطباق و اقطع السلاطة و اغرف لنفسي و و بعدين اكل و بعدين اقوم الم الاطباق و المع الترابيزات مثلا و اكنس مكان الفتافيت
اومال العامل اللي عندك دي شغلته ايه
و طبعا لما الحساب يبقا 56 جنية حضرتك زي الشاطر حتسيب 60 جنية يعني 4 جنية بقشيش
اومال يقولوا عليك بخيل
و تخرج و انت منشكح و حاسس انك ساهمت في رفع مستوى معيشة الشعب المصري

تروح تاخد عربيتك واحد يخليك تكسر فانوسك اللي ادام و اللي ورا و مش بعيد تدهسلك قطتين

و يقولك جت سلمية و ربنا فداك و مستني على الاقل جنية في الداخلة و جنية في الخارجة

خدت الطعمية و روحت للعيال
في البيت حتلاقي نفسك دافع 12 جنية في الهوا و اسمك اكلتهم طعمية في الاخر
و بالشفا ان شاء الله
خللي الشعب يعيش و يبقشش

مع تحياتي

ان الصحيح ليس دائماً شائع
وان الشائع ليس دائما صحيح

جزاك الله كل خير اخى الكريم