ولكن تأخذ الدنيا غلاسة

شركة كبرى تطلبت حاجة العمل عندها الى نشر اعلان فى احد الجرائد الكبرى تطلب فيه متقدمين لعدد من الوظائف بمواصفات و خبرات ومؤهلات محددة

*تم نشر الاعلان باللغة الانجليزية

فى اليوم التالى لنشر الاعلان اكتظ الايميل بعدد ضخم من رسائل ال cv و طلب العمل

واغلب الرسائل لا تتناسب بأى شكل مع متطلبات الوظيفة

فترى ان هناك وظيفة " مثلا " مدير مخازن مع خبرة لا تقل عن عشر سنوات

فيرسل اليك خريج تجارة دفعة السنة دى طازة شعبة زلابيا بتقدير مقبول

السيرة باللغة العربية لضعف الانجليزية

وهو يتمنى تحسين مهاراته من خلال العمل بالشركة

هو فين المهارات

اما تشغلونى هتتكتشفوها بنفسكم

وبعدين انا طامع فى كرم سعادتكم


*************************

وظيفة مصمم مواقع وشبكات انترنت

مطلوب خريج معهد كمبيوتر مع خبرة 3 سنوات فى المجال

فيرسل لك

زكى حنفى برعى

بكالوريوس زخرفة

خبراته
3 شهور فى مصنع عجوة

و اتمنى من اللة ان افوز بالعمل معكم

وطامع فى كرم سيادتكم

*************

اخر يرسل بذات ال cv لشغل كافة الوظائف مرة تلو مرة

بمعنى اذا كان هناك عشر وظائف مثلا

يرسل ال cv عشر مرات من باب الزن ع الودان امر م السحر يمكن يزهقوا و يشغلونى ف الاخر


واطمع فى كرم حضرتكم
******************

اخر لا يريد وظيفه ولكنه يملك مكتب محاماة رأى الاعلان فى الجرائد فبعث يرسل خدماته باسعار لاتقبل المنافسه


واطمع فى خدمتكم
*******************

اخر يسأل ..يا ترى بتخرجوا زكاة مال

متعملوش حسابى فيها

**************

فلان الفلانى يقطن باسوان و الوظيفة بالقاهرة " اتمنى العمل مع سيادتكم مع توفير مسكن"

واطمع فى توفير بوتجاز اربعة شعلة

**************

اخر يرسل ايميل يحتوى على خمسة عشرة cv له و لاصدقائه و جميعهم يتمنوا العمل

طمعانين فى عطف فخامتكم

***********

اخر يرسل ايميل بدون cv مش فاهمة يعنى مفروض صاحب الشركة يدخل شات معاه عشان يعرف بياناته

اطمع فى الدردشة مع جنابكم
*************

فى الحقيقة اصبت بصدمة الاسبوع الماضى و انا اصنف حوالى 2500 ايميل طلب وظائف حسب الخبرات المطابقة للاعلان
اكثر من 80% من المتقدمين لا يمتلكون الخبرات و المواصفات اللازمة
ومنهم من هو خارج الكارير الاكاديمى للوظيفة اصلا
ومنهم لا يعرف لماذا يرسل سيرته
ومنهم من لا يعرف كيف يكتب اسمه بطريقة صحيحة باللغة العربية و يأمل فى ان يفوز بفرصة عمل!!!

***************

نماذج محبطة و مؤسفة وكثير منهم يبالغ فى الخبرات المذكورة فى ال cv من باب لفت الانتباه ربما و حينما تتم الميتينج يكتشف خداعه بشكل فاضح

مقدرتش افهم ايه الدافع اللى يخلى النسبة دى كلها تبعت وكلها ثقة انها ممكن تشتغل وهى بتقدم نفسها بالشكل السافر دا

عايزة اقول ان اى شركة محترمة لا تلتفت ابدا لاى طلب عمل لا يتناسب مع متطلبات الوظيفة اللى هى محتجاها
مش تشدد و لا تزمت و لا استقصاد
وانما لان الشركة مش هتدفع رواتب ف الارض
اللى بيدفع مرتب بيدفعه نظير عمل عارف انه هياخد اده عشر مرات
وخصوصا فى القطاع الخاص

فى سلبيات اخرى كانت موجودة بس هناقشها من خلال الردود

خلينى اسمع منكم الاول خبراتكم مع كتابة السى فى و ايه رايكم فى المواقف دى عموما