ولا حــــــــــــاجه

من طرف **muslema_99** 2008-02-08, 3:58 pm

ولا حاجة
*****
الشاعرة : إيمان بكرى

نقول مافيش حاجة موش عايزة حاجة ولا محتاجة

ولو عايزة صحيح حاجة ما خليتوليش خلاص حاجة

عموما بصوا فيه حاجة حاأقولها بس محتاجة عقول تفهم

ولو حاجة ماهيش مفهومة أو حاجة.. نفسرها بكام حاجة

نوضحها بكام حاجة واهو حاجة مع حاجة حاتظهر وتبان لنا حاجة

وانا ما بأخفش من حاجة ما أنيش مسنودة ولا حاجة

لكن ما بأخفش ولا حاجة.. لكن فرضاً لو حاأقول حاجة

حايحصل إيه ؟ .. ولا حاجة.. حايعملوا إيه؟.. ولا حاجة

ولو بعد الشر بعد الشر واحد من القاعدين من السامعين

من الضالين فهم حاجة .. حايعملوا إيه؟ أكيد برضه ولا حاجة

ما نتوكل على الستار لوجه الله نقول حاجة..

فيه ناس بتعيش علشان (...) وفيه ناس تموت علشان (...)

و ناس تموت على الحاجة .. وناس تديلك الحاجة وهى ليها محتاجة

وناس تديلك الحاجة تاخد قصادها ميت حاجة وناس تكبرتقول حاجة

وناس تصغر علشان حاجة.. ونا س منظر وموش حاجة

وتلقى كبير.. حرس ونفير ..عليه منظر.. وهوجبان وشيخ منصر

ولا يتقالش عليه حاجة .
.
كلامى ده يا خلق فيه حاجة؟.. لحد دلوقتى فيه حاجة؟.
.
كلام عادى ولا فيهش ولا حاجة .. ما أنا ماقدرش أقول حاجة

صحيح كان ودى أقول ميت حاجة لكن موش قادرة أقول حاجة

لأنى لو حاأقول حاجة .. حايجى ناس بتوع حاجة وحايخدونى

ورا الحاجة .. وهو لو سمع حاجة حايعملوها لى ميت حاجة

عموماً بصوا لو حد من القاعدين عايزنى أبلغه بحاجة يقول

ما يخفش من حاجة .. نعم .. فيه إيه؟ .. لا.لا.لا...

مافيش سرقة ولا تهليب ولا تهريب ولا فيه حاجة

وبتقول إيه ؟لا. لا.. ومصمصوا إيه ؟.. وخصخصوا إيه؟.
.
ده كله كلام ما فيش حاجة .. قضية إيه ؟ .. حرامى إيه؟

ولكح إيه ؟.. وهرّبوا إيه ؟.. شفافية ومافيش حاجة

وبتقول إيه ؟ لا.لا.لأ ..عيب .. لافيه تدليس ولا ترقيص

ولا تدبيس ولا حاجة .. سمعمع هس أنا حاسة إن فيه حاجة

دقيقة سكات لتبقى أحزان أنا حاسة إن فيه حاجة

أنا عن نفسى موش حاسة بحاجة .. ولا متضايقة ولا حاجة

سعادتك زىّ ما فيش حاجة .. أهوه بيقول مافيش حاجة

وجنابك برضه زيّ وعلشان زىّ مافيش حاجة ؟ ..أهوه بيضحك

وبيقول ما فيش حاجة..ماأنا قلتلكم من الأول ما فيش حاجة

علىّ النعمة ياإخوّانا مافيه حاجة.. ورحمة أبويا ويا أبوك

على اللى جابوك.. ما فيه حاجة... وعهد الله.. وعهد الله..

وعهد الله.. ما اتكلمنا ولا حاجة وبقولك إيه خلاص خلص

وسيب إن شاالله يااخوانا .. مافيه حاجة

*********
lol!