شريف وشريفه

دى مش يوميات شريف وشريفه ده يوم لمواطن شريف جار عليه الزمن واتعامل مع موظف بس شريييييييف قصدى شريفه ييييه قصدى شريف برضه

المواطن : استاذ سيد مش كده ؟
سيد : يانعم ايوه انا خير افندم ؟

المواطن : خير ان شاء الله انا جايب الورق ده لحضرتك عشان تخلصهولى هو واقف على توقيع حضرتك بس الله يخليك انا مستعجل عليه خالص

(يمسك سيد الورق بدون اهتمام )

سيد :ومستعجل ليه العجله من الشيطان وبعدين انتوا كده متفتكروش نفسكم غير فالاخر وتيجوا بس تستعجلونا

المواطن : معلش اعمل ايه مكنتش اعرف غصب عنى بس الله يخليك انا واقف حالى

سيد : خلاص طيب دفعت الرسوم المطلوبه ؟

المواطن : اه كله والايصال اهه

(لاينظر للايصال )

سيد : بس انت لسه مخلصتش مع الاستاذ لطفى

المواطن : لا استاذ لطفى مين معرفوش وبعدين هما قالولى حتدفع 10.40جنيه بس
سيد :شكلك اول مره تيجى وحتقرفنى

المواطن : اه والله معلش اصلى اول مره ادخل هنا ومش عارف الاجراءات قولى بس هو فين وانا اروح له

سيد : اهه قدامك يابنى يأما تدينى الفلوس وانا اديهاله
المواطن : ماشى مفيش مشكله طب هيه الفلوس دى ضمن المصاريف يعنى ؟اصلهم قالولى انها 10جنيه و.40 قرش طابع دمغه وانا دفعتهم

سيد :بقلك ايه انت حتقرفنى ليه بص من الاخر احنا عايزين الشاااااااى بتاعنا

المواطن : مفيش مشكله هو فين الساعى وان اجبلكم شاى او اللى انتوا عايزينه

سيد :فيه ايه انت عبيط ولا بتستعبط فهمنى بالظبط ومتقرفنيش ؟

المواطن : ليه بس كده يا استاذ سيد ليه الغلط ده ؟ دى اول مره ادخل عندكم عموما مقبوله من حضرتك

سيد :انت شكلك كده او مره تدخل الدنيا انت مش عايش فى الدنيا ولا ايه
بص بص ورقك ناقص كمله وتعالنا الاسبوع الجاى

المواطن : ليه بس انا رجعته مع الاستاذ اللى تحت وقالى كده خلاص واقف على امضاء حضرتك والختم

سيد : انت حتعرف اكتر منى ولا حتعلمنى شغلى انا قلت ناقص وبعدين مفيش ختامه

ويالا بقى خلينا نشوف مصالح الناس انت كده معطل سير العمل

المواطن : ليه بس ياسيد بيه كل سنه وحضرتك طيب والله انت مش عارف والله انا سالف الفلوس دى والله

سيد : بقلك ايه احنا مش فاتحنها شئون اجتماعيه هنا يالا يافندى متعطلناش

المواطن :يا سيد بيه معلش مش قصدى انا اصلى غريب والغريب اعمى ومخى على قدى الله يخليك متزعل منى

سيد : طب اعملك ايه عمال اجيلك كده تجيلى كده مش كفايه القرف اللى احنا فيه ومرتبات زى الزفت كمان حنصرف على الحكومه ورق وملفات لكل طلب ملف الحكايه بقت مش جايبه همها خالص ندفع من جيوبنا كمان

المواطن :خلاص مفيش مشكله عشان ملف يعنى طيب شوف عايزه ورق ولا بلاستيك

سيد :اللهم طولك يا روح باين كده حصور قتيل

المواطن :ايه بس ياسيد بيه طب تاخد حضرتك تجيب بمعرفتك

سيد :ايوه كويس بدأت تفهم اهه شفت اديك بقيت على الخط معايا اهه

المواطن : معلش اصلى جديد دا سعادتك تأمر عايز كام ؟

سيد :شفت اهه كده عايزين 50 ده بس عشان انت لسه جديد ومش عارف النظام ولازم نقوم معاك بواجب

المواطن : بس وكل الخوته دى عشان خمسين قرش بس اهه ياسيدى جنيه بحاله

سيد :اللهم طولك يا روح اطلع بره

المواطن : ايه بس مش حضرتك اللى قلت دنا دافع بزياده

سيد : خمسين جنيه يا فندى يا محترم

المواطن :ايه خمسين جنيه ليه

سيد :من غير ليه بص خد ورقك وريحنى انا مش حشتغل النهارده حعمل اجازة شهر

المواطن : خلاص خلاص بس مش كتير شويه

سيد : وبعدين انت زهقتنى حرام عليك اتقى الله فيا هو انا ححطهم فى جيبى لوحدى
(ويرمى الملف على الارض )

المواطن :خلاص خلاص ميبقاش خلقك ديق كده اهم 50جنيه

(يأخذ الفلوس ويضعها فى الدرج )

سيد :ايوه كدة دا نت متعب جدا مشفتش فى حياتى كده ولا حد كده خالص ما كان من الاول

المواطن : معلش انا اسف استأذن حضرتك فى طلب صغير ؟

سيد : نعم تحت امرك

المواطن :كنت عايز بس فاتوره بيهم عشان بس الضرايب احطها ضمن المصروفات ؟؟؟؟؟؟؟؟؟؟؟؟؟؟

السلام عليكم
جــــ الله ــــــــزاكى خيرا على هذا الموضوع
الله المستعان على هذا

جزانا واياكى اختى الكريمه
واشكرك على طلتك الرقيقه